KYRKJEVERT-DUO: F.v. Tom og Inge Hareland er funksjonsnedsette. Det hindrar dei ikkje i frivillig teneste i Brynekyrkja.
Helene Reite Uglem
Barrierefri kyrkje:
– Dei tilfører noko heilt spesielt
Ny rapport viser at folk med funksjonsvariasjonar kjenner seg inkluderte i Den norske kyrkja. Tvillingane Tom og Inge Hareland har vore frivillige i Bryne kyrkje i over 20 år.
Det er søndag. Tom og Inge småspring over parkeringsplassen framfor Bryne kyrkje. Dei har gule vestar, målretta blikk. Klokka er halv elleve, og snart ringjer kyrkjeklokkene.
Sjølv om Bryne kyrkje har «mykje gode kaker», er det ikkje berre kyrkjekaffien som gjer at dei einegga tvillingane nesten kvar søndag tek på seg kyrkjevert-skilt og stiller seg opp med dørknappen og kaffikanna.
NRK-serien A-laget fekk fram smila i norske stover denne vinteren. Tom og Inge bidreg med det same i kyrkja.
