Pinsepastor går saman med ImF-pastor om å halde søndagsmøte: – Dei er pinsevener med barnedåp

Dei er nesten like store, har like verdiar og lik møtekultur.

Det var bare to ting, som indremisjonsforsamlinga Fredheim Arena og pinsevenene i Klippen ikkje hadde til felles: møte og dåpssyn.

For tre år sidan kom det første på plass. Det siste styrer dei to pastorane unna når dei er saman.

Dei fokuserer heller på det som er felles:

– Eg føler langt på veg at Fredheim er pinsevener med barnedåp, seier Dag Eivind Noreid i Klippen.

Pastor Andreas Bjørntvedt i Fredheim Arena bryt ut i latter.

– Det tar eg som eit kompliment.

– Stort behov

Dei to kyrkjelydane i Sandnes samlar mellom 150 og 250 personar på fellesmøtene om somrane.

Også i påskeferiane har dei fleire gudstenester saman.

– Oppmøtet viser at behovet for faste møte i ferien er stort, seier Noreid.

I 17 år var han pastor i ein liten baptistkyrkjelyd. Mesteparten av tida var han einaste tilsette. Det var likevel bare to søndagar i løpet av dei 17 åra at det ikkje var gudsteneste.

– Eg har alltid vore litt der: korleis kan store kyrkjelyder, som IMI, Fredheim og Klippen, ikkje tilby noko om sommaren, seier han.

Bjørntvedt tenkte det same og prøvde seg først på sommarmøte bare for eiga bedehusforsamling for fleire år sidan.

Oppmøtet var dårleg.

På dette forsamlingshuset tar de «aldri» ferie

Så tok han kontakt med Klippen og lurte på om dei ville samarbeida om sommarmøte.

Det ville dei.

– Det finst fleire forsamlingar og kyrkjelyder innanfor dykkar eigne kyrkjesamfunn i Sandnes. Kvifor valde de kvarandre?

– Det var nok ein kombinasjon av at vi har ein god relasjon til dei, og at dei er også ein generasjonskyrkjelyd med en lang historie. Eg likte også tanken på å prøve å gå litt på tvers av kyrkjesamfunn, seier Bjørntvedt.

Enkelt og intimt

Om sommaren har dei ansvar for annan kvart fellesmøte.

Dei gjer det enkelt.

Møteleiaren taler. Kyrkjekaffien droppar dei viss ingen melder seg. To personar har ansvar for barneopplegget. Barna må kome ifølgje med ein vaksen.

Bak i møtesalen denne søndagen har ungdommar meldt seg til teneste bak miksepulten. Oppe på scenen står trommesettet og samlar støv.

Lovsangsteamet, som i dag består av to personar, har flytta ned på golvet.

Dei har plukka ut kristne slagarar frå 40-talet og fram til i dag.

Slepp til nye ansikt

ImF-forsamlinga og pinsekyrkjelyden er stort sett enige om musikkstil.

Internt i Klippen er det derimot ulike synspunkt på kvorvidt dei skal satse på profesjonalisert lovsang og høgt teknisk nivå eller om lista skal leggast lågare for å få med fleire i tenesten.

– Det kan bli litt vanskelegare å rekruttere frivillige når lista er lagt så høgt. Sommarmøtene kan bli eit høve til å løfte fram nye ansikt og ein enklare møtestil, seier Noreid.

Han ledet lovsang for hundrevis hver søndag. Jakten på et enklere kirkeliv førte Matt (41) tilbake til hans norske røtter

Bibelen som avgud

Siden dagens fellesmøte er på Klippen er det Dag Eivind Noreid som talar.

– Som kristne kan vi bli mer opptatt av bibelens bokstavar og reglar enn av Han som ga oss Bibelen. Men vi følgjer ikkje ei bok, vi følgjer Jesus, seier han og utdjupar:

– Å lese i Bibelen ikkje er ein garanti for at ein har Jesus i hjarte.

Som døme trekk han frem Ku Klux Klan som siterer bibelvers og djevelen som brukte BIbelen då han freista Jesus i ørkenen.

Løysinga, ifølgje Noreid, er å vera fylt av Den heilage ande. Det skal visa igjen i livet ein lever.

– Viss eg lever slik at tollarar og syndarar ikkje orkar å vera saman med meg liknar eg ikkje på Jesus. Då gjer eg noko fundamentalt feil. Det har blitt sterkt for meg denne sommeren, seier pastoren.

– Kjekt å sjå andre kristne i byen

På kyrkjekaffien etter møtet møtes dei to kyrkjelydane over heimebakte kaker, vannbakkels og bollar, fiksa av ukrainske frivillige i Klippen.

I foajeen treff Dagen Kjetil Selvåg frå Klippen.

Han har klare meiningar om fellesmøte.

– Det er kjekt å sjå andre kristne i byen og bli kjent med ulik type forkynning. Her står me samla som kristne og får høyra Guds ord. Det er veldig, veldig godt, seier han

Jørn Goa frå Fredheim er einig.

– Det er fint å vera mange samla og får tydeleg forkynning av Guds ord, seier han.

Ekteparet Margrethe Fossdal og Knut Morten Stokka har bakgrunn frå høvesvis Fredheim Arena og Klippen.

Nå går dei begge stader:

– Det er veldig kjekt at dei får til det fellesskapet, seier Margrethe.

Ingen av pastorane har høyrt negative tilbakemeldingar.

Det trur dei har å gjere med at kyrkjelydane har mykje til felles.

– Me må våge å sjå kor like me er. Sjølv om Klippen er i ein annan konfesjon er dei kanskje meir like oss enn mange i vår eigen konfesjon, seier Fredheim-pastor, Andreas Bjørntvedt.

Dei to pastorane tek med seg ny giv inn i haustsemesteret, idet fellesmøtesesongen er ved vegs ende.

– Eg kjenner meir på at vi kristne her i byen står meir saman etter ein sommar med fellesmøte, seier Noreid.

Fredheim-pastoren er inspirert av det diakonale arbeidet til Klippen.

– Vi har ønske om å bli meir multikulturelle, slik som Klippen. Det inspirerer også å sjå kor mykje de har hjelpt menneske som har det vanskeleg i byen vår, seier han.

Pinsemenighet jubler for vekst: Hundrevis på gudstjeneste hver søndag