Eit djervt forsøk på å seia noko nytt og vesentleg om norsk kristenliv

Trond Nordby har vore professor i statsvitskap ved Universitetet i Oslo. Han har særleg arbeidd med norsk politisk historie. Mykje av innsatsen har han samanfatta i «Norges politiske system etter 1814». «Korporatisme på norsk, 1920–1990» og «Det moderne gjennombruddet i bondesamfunnet. Norge 1870–1920» er andre sentrale arbeid.

Ein biografi om tidlegare helsedirektør Karl Evang er også i porteføljen hans. På sine eldre dagar har han fatta interesse for lokalhistorie. Og no har han altså gjeve seg i kast med kristne lekmannsrørsler.

Siktemålet var å undersøkja korleis dei har påverka samfunnet og samfunnsutviklinga, ikkje minst i demokratisk lei. Det er eit underforska og forsømt område som han med denne boka vil retta på.