Historisk bibel selt for 419 millionar kroner

Nyleg samla ei rekke rikfolk seg på det verdskjende auksjonshuset Sotheby's i New York.

På podiet stod verdas eldste kopi av Den hebraiske bibel, Sassoon-kodeksen.

I fire intense minuttar bydde to aktuelle kjøparar mot kvarandre før salet enda på 38,1 millionar dollar, tilsvarande 419 millionar kroner.

Med det var det dyraste manuskriptet som nokon gong er selt eit faktum, ifølge BBC.

Tilhøyrer det jødiske folk

Det er likevel berre det dyraste manuskriptet og ikkje det dyraste historiske dokumentet gjennom tidene.

Auksjonerer bort bibel til 500 millionar kroner

For to år sidan kjøpte nemleg multimilliardæren Kenneth Griffin ein kopi av den originale amerikanske grunnlova for 43,2 millionar dollar.

Den heldige som stakk av med den eldgamle kodeksen var den tidlegare amerikanske ambassadøren Alfred H. Moses.

Forskar fann ukjent fragment frå Det nye testamentet

Han planlegg ifølge det amerikanske mediehuset CBS News å donere verket til det jødiske museet ANU – Museum of the Jewish People i Tel Aviv. Det er eit museum som tek for seg historia til det jødiske folk frå bibelsk tid til våre dagar.

– Den hebraiske bibelen er den med mest påverknad i historia og utgjer grunnlaget for vestleg sivilisasjon, seier han i ei utsegn til Sotheby's.

– Eg gleder meg over å vite at den tilhøyrer det jødiske folket.

Nytt gjennombrot i forskinga – kan datere bibelske hendingar

Historisk dokument

Det rådyre manuskriptet blei til i eit kloster i området rundt Israel og Syria for 1100 år sidan, og er den eldste, nesten fullstendige kopien av Den hebraiske bibelen.

Skriftet forsvann ein gong på 12- 13-hundretalet, men dukka opp igjen i 1929 då den kjente boksamlaren David Solomon Sassoon (1880–1942) kjøpte den.

Seinare vart manuskriptet oppkalla etter han.

Då Dagen i februar melde om at auksjonen skulle finne stad, kalla Rune Arnhoff, leiar av Nordisk Bibelmuseum i Oslo, verket for «heilt unikt».

– Eg tenkte: Kva, har ein funne ein så gammal, komplett hebraisk bibel. Den har jo vore kjent sidan 1929, men det er nok få som har kjent til at den har eksistert. Dette er nærast ei nyoppdaging, sa han til Dagen den gongen.