Anmeldelser
Interessant og lærerikt om Hauges mange reiser
Publisert
Sist oppdatert
Det er ei kjent sak at Hans Nielsen Hauge reiste mykje rundt om i landet. Det er utruleg kva han kom over på få år og med dei kommunikasjonsmiddel som var då – stort sett eigne bein og båt med segl. Mange har skrive om dette, men denne boka skil seg likevel ut med måten Hauges reiseverksemd er presentert på.
Så langt eg forstår, er ikkje forfattaren historikar, men derimot har ho skrive bøker om sykkelturar, og det er bakgrunnen for ideen med denne boka. Ho har delt Hauge sine reiser inn i 12 turar, der ein kan følgja spora hans på sykkel eller anna måte. Hauge sine reiser vert ikkje presenterte kronologisk eller historisk, men geografisk eller områdemessig. Med det er vi over det meste av landet, pluss ein tur til Danmark.
Annonse
Det seiest på omslaget at ved å følgja i Hauge sine spor på denne måten, får vi vita mykje vi «tidligere ikke visst om Hauge og vennene hans». Det trur eg er ei overdriving med tanke på folk som har historisk kjennskap til Hauge og haugianarane.
Det nye er måten stoffet er sett saman og presentert på, pluss at det nok er ein del lokalkunnskap som ikkje alltid kjem med i Hauge-bøkene. Det er ikkje eit forskingsarbeid som frambringer ny kunnskap, men det baserer seg på tidlegare forsking og framstilling. Her er samla svært mykje kunnskap om Hauge si reiseverksemd, medarbeidarane hans på reise og stadene han vitja. Det er ei omfattande litteraturlister og dokumentasjon til kvar av turane. Dessutan er her mange gode og interessante bilete som presentasjon av dei ulike stadene.
Boka inneheld ikkje så mykje om Hauge si forkynning og hans teologi, men her er mykje om kor han har forkynt, næringsverksemd han fekk i gang og bokskrivinga. Eg synest det heile er godt presentert, og eg har lite å setja fingeren på. Eg er imponert over all kunnskapen forfattaren har henta fram, og det ofte på detaljnivå.
Eg var litt skeptisk ved starten av lesinga, men konklusjonen er at dette er ei lærerik og interessant bok. Ho har sin rettkomne plass blant alle bøkene om Hans Nielsen Hauge som har komme dei siste åra. Boka er lett å lesa.
