Lærerikt om profilerte forkynnarar

Det norske lekmannsarbeidet har vore rikt på forkynnarar eller emissærar av ulike mennesketypar og ulike nådegåver. Frå Hans Nielsen Hauge og fram til vår tid har det vore mange tusen. Dei siste åra har det minka veldig med denne typen arbeidarar. Det er nokre att, men no er svært mange i dei kristne organisasjonane anten knytte til forsamlingar eller til spesialoppgåver. Det er etter kvart slik at dei som går på bedehuset, ikkje kjenner til den omfattande verksemda som omreisande emissærar stod for og den forkynninga som dei framførte på bedehusa.

I denne boka gir Ove Sandvik, som sjølv har hatt mange og ulike oppgåver i Norsk Luthersk Misjonssamband (NLM), oss eit møte med eit knipp forkynnarar. Nokre av dei har samstundes vore misjonsleiarar. Opp gjennom åra har Sandvik skrive korte portrett av misjonsarbeidarar på ein av sine to bloggar. Dette har han lagt mykje arbeid i, og no har han samla over 20 av desse i denne boka. 

Dei aller fleste har vore knytte til NLM, sjølv om nokre har verka litt breiare enn det eller før NLM si tid. Fleire av dei verka mest på Sør-Vestlandet, men ein del verka over heile landet. Tidsmessig startar det midt på 1800-talet og er fram til omkring år 2000. Det er ikkje med nokon frå den første haugianske tida. Det er nokså ulike personar som vert skildra, og frå ulike periodar av kristenlivet og bedehuset.