NRK-cowboyen inviterer 5000 på lovsongskonsert på heimegarden: – Det blir magisk

«Denne songen og denne stemma gir meg heilt frysning, og er det andre som liker denne, så skriv ein helsing eller stort halleluja unna, del gjerne (...). Passar med 500 Yes, vil eg prøva og få denne gruppa til Kongsdalen neste år», skreiv Arvid Mæland til sine 18.000 Facebook-følgjarar sist veke.

Lovsongen Goodness of God, framført av Jenn Johnson i amerikanske Bethel Church, har nå fått NRK-profilen Arvid Mæland til å sette himmel og jord i rørsle.

Han vil ha lovsongskonsert og vekking.

Responsen lét ikkje vente på seg.

Lovsongskonsert på høgfjellet

Innan eit døgn var gått, hadde han fått langt over 500 likes, kommentarar og personlege meldingar med Yes og Hallelujah.

Nå gjeld det berre å få Jenn Johnson og resten av bandet på kroken.

Arbeidet har alt starta.

Konsertstaden er klar: ute på eit slettelandskap i Lauperak-heiane i Bjerkreim kommune.

For å få lovsongsdraumen realisert har Mæland kontakta bandet og bydd dei 1 million kroner.

Nå står det berre att å vente på svar.

Kjend for konejakt, kongestunt og misjonssjukehus

Dei fleste kjenner Mæland gjennom NRK-serien Cowboyen og kongen.

Her følgjer vi Mæland si jakt på kone nummer fire, arbeidet med å få hogga inn eit kolossalt hovud av Kong Harald i ein fjellvegg og innsamlingsaksjonane til misjonssjukehuset Haydom i Tanzania.

Bonden Ingar (67) samla inn nesten to millionar kroner til misjonssjukehus på ein kveld

Første sesong var ein braksuksess. Så dabba det litt av, og det er usikkert om det blir ein tredje sesong.

Mæland veit at det avheng av at det skjer noko spennande i livet hans.

Kanskje kan ein lovsongskonsert i bjerkreimsheiane kan gjere susen?

Startar i fjøset

Arvid Mæland tek imot Dagen på garden heime i garden Kongsdalen. Då er han først opptatt av heilt andre ting enn lovsong.

40 kyr skal merkast og få medisin for innvolsorm.

Det er berre eitt problem.

Ikkje alle storfea er interessert i å lystre. Blant dei er ein omfangsrik stut med brutale horn og bekmørkt blikk, kalla El Toro, med jærsk rulle-r.

– Eg må vera litt forsiktig her, for eg er åleine, seier Mæland.

Med røyken i eine handa og kraftfôr-bøtta i andre prøver han å lokke El Toro inn på lasteplanet.

– Dei horna ser farlege ut. Kvifor har du ikkje fjerna dei?

– Eg pleier ta dei vekk på dei fleste, men nokon får behalde dei, som El Toro her. Du veit, ein okse utan horn er som ei dame utan bryst, seier Mæland.

El Toro vinn slaget denne gongen og slepp medisin enn så lenge.

Dagens utsende let seg derimot lokke med inn i traktoren og opp på fjellet med kyrne.

Det tek ikkje lang tid før samtalen dreiar inn på lovsong og songen «Goodness of God».

Noregs mest kjende cowboy reagerte spontant då han såg videoen for første gong sist veke.

– Eg fekk frysningar over heile meg.

Det er ikkje første gong lovsong får han til å reagere slik.

Oppsøkjer lovsong og gospel i USA

I facebookinnlegget fortel Mæland om sterke opplevingar med lovsong på dei guida turane han har til USA. Første gong han høyrde ein moderne lovsong var på ei slik reise i 1993.

Sidan den gong har han ikkje sett seg tilbake.

Nå er spontan deltaking på tilfeldige kristne søndagsmøte blitt ein vane på utanlandsturane han arrangerer.

– Eg gir beskjed til dei som vil vera med, om at dei må løfte hendene og syngje med, viss dei skal få noko ut av det. Då gjer dei som dei får beskjed om.

Etter å ha reist verda rundt og treft gode menneske frå alle religionar, trur ikkje jærbuen lenger at det finst berre éi sann tru.

Men han ivrar for å dele lovsongsopplevingar med andre, og han ivrar for vekking.

– Du kan ha det fint når du sit åleine og lyttar til lovsong, men når du har ti tusen mann rundt deg til å dele opplevinga med, då blir det magisk.

Vil samle 5000

På konserten håpar han å foreine både kristne og ikkje-kristne.

Det skal skje utandørs, ein stad oppe på heia, ikkje langt frå der han nå slepp kyrne ut på beite.

Enkelt blir det ikkje. Ikkje rimeleg heller.

Mæland har høyrt rykte om at fleire av dei store lovsongsbanda krev å fly business-klasse, at dei tek ikkje inn på hotell kor som helst. Dei må ha det beste lyd- og sceneutstyret. Der ryk det fort ein million til.

Når konserten er utandørs kan det komme ytterlegare krav for å sikre komfort i alle ledd.

Ofte er det bodkrig mellom konsertarrangørar, men responsen på facebookinnlegget har gitt han trua på at publikum er villig til å bli med på spleiselaget.

Håpet er å trekke 5000 til lovsongskonsert på Lauperak.

Håpar på vekking

Han viser fram ein sms frå ein som skriv han høyrde på lovsongen 20 gonger, etter at Mæland delte han på facebook-sida si «det er som du seier, får frysningar», skriv avsendaren.

– Han veit eg at i alle fall ikkje er kristen, fastslår Mæland.

Han veit at mange følgjer med når han legg ut gospel og lovsongar.

– Det er viktig å dele desse songane med folket, så dei får høyre litt forskjellig. Du veit ein sauebonde kan ikkje berre halde på med sau, og ein fotballfan kan ikkje berre bruka tida på fotball. Det gjer livet for lite. Derfor treng me lovsong og vekking.

Det vil fleire av dei som har kommentert Mæland sitt innlegg også.

«Yes! Eg kjæme! Vekkelse i bjerkheim next», skriv ein.

Og ein annan:

«Nå snakke me, Mæland! Æg kjæme, å sende du røyksignal te Varhaug så får du fort nogen hundre derfrå ao».

Ein tredje:

«Får du de til å komme så har du for liten plass på garden! Book ein arena med plass til 10.000. Dette må du få til!»

– Betre enn alkoholrus

Viss lovsongsstuntet med Jenn Johnson går i boks, blir det første konsert han arrangerer utan alkohol.

Han trur ikkje det vil leggje noko dempar på stemninga.

– Eg forstår at kristne som går på slike møte ikkje treng annan rus, for den rusen du får av å vera saman i lovsong er mykje betre, seier Mæland, medan han parkerer traktoren nede på tunet.

Så koplar han favorittlovsongen på anlegget og viser Dagen rundt.

Stemmen til Jenn Johsen fyller Kongsdalen:

«I I love You, Lord, Oh, your mercy never failed me».

– Når eg høyrer dette kjenner eg det på meg, korleis det er å vera på slike møter og lovsyngja saman, seier Mæland, i det han passerer leivningar frå gårsdagens fest, i ei trillebår på veg inn i låven.

Låven har han gjort om til eit westerninspirerert festlokale. Her inne finst både tappekran, totempåle og ein gammal talarstol frå Line bedehus.

På anlegget har Jenn Johnson nå komme til refrenget.

Mæland stig opp på talarstolen og veivar med armane i takt med musikken. Dagens utsende får det travelt med å finna fram kamera.

– Still deg nå slik at du får med korset, kommanderer Mæland.

Det rekk til eit par bilde, før Mæland snur seg, forlèt talarstolen og rettar fokuset ein annan stad.

Han har det travelt.

El Toro og dei andre ustyrlege oksane må få medisinane sine. Etterpå er det ein matfestival i Stavanger som skal besøkjast. Men så, når kvelden blir til natt igjen og cowboyen vender heim att til stova i Kongsdalen. Då er det nok ein gong lovsong som står på programmet.

– Det gjer meg roleg, seier Arvid Mæland.