Professor fascinert av korleis forfattarar gjenoppdagar Bibelen

Forholdet mellom teologi og litteratur har interessert Sørbø gjennom heile yrkeslivet. Han begynte som journalist i Dagen på 1980-talet. Så var han i Stavanger Aftenblad nokre år før han etter kvart vart professor ved Høgskulen i Volda.

I fjor runda han 70 år og er blitt emeritus. Men på loftet i Lettbygget på campus i den sunnmørske bygdebyen har han framleis stua inn eit skrivebord, mange hyllemeter med bøker og ein lenestol å lese dei i.

– Det slår meg at litteratane og diktarane som tek i bruk bibelforteljingane, og tek i bruk bibelske ord og vendingar, ofte gjer det på ein forfriskande måte, seier Sørbø.