Salmar, songar og viser eg trur mange vil finna glede i

Nils-Petter Enstad markerer sin 70-årsdag med å gje ut ei lita samling med salmar, songar og viser, som han har skrive gjennom ein periode på 25 år og ved ulike høve. Boka er delt inn i tre bolkar ut frå desse tre kategoriane, sjølv om det ikkje er vasstette skott mellom dei.

Enstad har skrive mykje opp gjennom åra, og det innan ulike litterære sjangrar, men dette er første lyrikksamlinga – sjølv om han har skrive dikt gjennom heile livet. Han er også ein flittig bidragsytar i Dagens spalter, både med opplysande omtalar av personar og songar, men også med debattinnlegg, til tider nokså polemiske.

Eg synest dette er ei fin samling av salmar, songar og åndelege viser. Dei er gode både etter form og innhald. For ein del av dei er det opplyst kva samanheng dei vart skrivne i, og det er opplyst om melodiar nokre kan syngjast til. Det er også nokre bilete som illustrasjonar.