Unikt dokument frå det norsk-jødiske miljøet

«Korsveien» er ei spesiell bok. Ho kom ut i 1946. Forfatter er Elsa Dickman, fødd 1918. Ho var norsk jøde, som klarte å koma seg i tryggleik i Sverige heilt på slutten av 1942. Då var ho 24 år. Mora hennar døydde rett før andre verdskrigen. Dei fleste andre i familien hennar gjekk til grunne i holocaust. I Sverige skreiv Dickman romanen «Korsveien» som kom ut på svensk alt i 1945, og omsett til norsk året etter.

Jødane i livsfare

Dickman fortel om korleis det var innan det norske jødiske miljøet i Oslo, dels i åra før verdskrigen, med barndomsminner og liknande. Og ikkje minst uroen og angsten som prega dei etter kvart som nettet snørte seg til rundt dei, og kva som skjedde seinhaustes 1942 då alle jødar kom i livsfare, og på hundrevis vart deporterte, medan andre klarte å koma seg i tryggleik.