Vakkert og engasjerande om ortodoks teologi

For Alexander Schmemann er det teologien i det levde kristenlivet, i liturgien, som er det sentrale, ikkje dei akademiske stridsspørsmåla. Han skreiv denne boka i 1963 som representant for den ortodokse kyrkja, og med base i USA, for å presentera kjernen i ortodoks kristendom for eit protestantisk publikum.

Eukaristien som utgangspunkt

Schmemann tek utgangspunkt i nattverdssakramentet, eller eukaristien, for på den måten å gjera greie for nokre hovudpunkt i ortodoks teologi. Ved å følgja gangen i liturgien for eukaristien, som er mykje meir omfattande og innhaldsrik enn den vanlege protestantiske nattverdsliturgien, oppnår han på vakkert vis å skildra særtrekk ved den ortodokse kyrkja og plassera seg sjølv både midt i denne og som fornyar av ortodoks teologi.