Atomkraft? Nei takk!

Vi kjem til å trenge mykje meir straum. Vi må slutte å bruke kol, olje og gass. Vind- og solkraft treng svære areal, skaper interessekonfliktar på land og hav og er dessutan vêravhengig. Og vi vil ikkje byggje ut alt vi har av vassdrag.

Altså står vi i trongsteg, i ein uløyseleg situasjon. Da må vel svaret vere atomkraft? Eit kraftverk som står på ei ikkje veldig stor grøn eng og summar utsleppsfritt, støyfritt, stabilt med enorm kapasitet i alt slags vêr gjennom 60 år. 

Når ein mann står i trongsteg og held på å fryse i hel på ei fjellhylle, er han også i ein uløyseleg situasjon. Svaret kan vere å pisse i buksa. Det løyser problemet der og da. Men det blir lagnadstungt viss bergingshelikopteret får trøbbel og kjem for seint.