Debatt
KREV SVAR: Stefanusalliansen, ved Johannes Morken, har også tidlegare bede styresmaktene om svar utan å få det: Kva seier Noreg til India om haldninga til minoritetar når dei inngår handelsavtalar? På biletet: Utanriksminister Espen Barth Eide.
John Solsvik
Ber utanriksminister og bistandsminister svara: Kva seier Noreg til India om hat og vald mot religiøse minoritetar?
Dramatisk vekst i dokumentert vald mot kristne varslar ille like før ein knapp milliard indarar går til val. Landet er i praksis blitt ein hindustat.
Ein alarmerande rapport kom på bordet mitt like før eg skulle ta påskeferie. For medan vi her heime kunne venta oss ei fredeleg påsketid, opplever kristne i India ei tid der ekstremistar gjerne ser som høgtid for hatprat og vald mot nettopp kristne.
Rapporten bør få oss til å vakna: På eitt år har talet på dokumenterte valdelege angrep på kristne i India stige med nesten 50 prosent – frå 423 i 2022 til 601 i fjor, ifølgje rapporten som kjem frå Evangelical Fellowship of India (EFI), ein paraplyorganisasjon for evangelikale kyrkjer.
Rapporten fortel også om sterk vekst i hatprat. Hatet blir ikkje, ifølgje rapporten, imøtegått av styresmaktene. Tvertimot: Det synest som at hatet vert akseptert og at samfunnet blir meir og meir immunt mot hat og mot valdelege angrep mot kristne – og mot muslimar.
