Bestialitet og martyrium

Når bestialitet vert grunngitt med eit guddommeleg mandat, er det djevelske krefter som får herja – i eit islamistisk kalifat og eit storrussisk rike.

Året var 2014. Svartkledde IS-krigarar hadde i juni okkupert storbyen Mosul og med truslar om død eller konvertering tømt byen for kristne og andre minoritetar.

Frå den 3. august drap IS-krigarar for fote i og rundt Sinjar, den viktigaste byen for jesidiane, ein for oss den gongen litt ukjend religiøs minoritet. Terrorgruppa fylte massegraver. Over 6400 unge kvinner vart kidnappa – til sexslaveri, overgrep og vidaresal med prislapp. Unge menn vart tvangskonverterte og indoktrinerte til å bli krigarar.