Betre pasientreiser med lokalkunnskap

Pasientreiseordninga har vorte for tung og byråkratisk. Dagleg vert pasientar på veg til helsetenester råka av dette. Me skal stake ut ein ny kurs for ordninga, for å sikre likeverdige helsetenester i heile Noreg.

Som tidlegare ordførarar er me godt kjent med dei lokale utfordringane med dagens pasientreiseordning. Transportørar som ikkje møter til avtalt tid, har for mange om bord i køyretøyet eller ikkje har tilpassa køyretøy for til dømes personar med hjelpemiddel og rullestol.

Eit einsidig fokus på lågast mogleg pris, og ikkje kvalitet, gjere kvardagen for enkelte pasientar uhaldbar. Lokal tilknyting og lokal kunnskap vert utkonkurrert til fordel for pris. Me meiner at me ikkje må spare oss til fant og sette marknadstenking over pasientar.

Me meiner følgjande må på plass:

Gode transportørar med lokalkunnskap må prioriterast i anbodsrundane.

Betre informasjonsflyt og bruk av same sjåførar, for å få rett bil på rett tid.

Mindre etterarbeid og byråkrati. Med ny teknologi kan refusjon for reiser handterast mykje enklare.

Betre utnytting av kapasitet og samkøyring, gjennom meir og betre planlegging.

Avlaste legar og henvisarar sine krav om attest. Det må utviklast i eit tillitsbasert system.

Gjennom eit godt arbeid frå regjering og Storting i å bryte opp drosjefrisleppet til Høgre og Frp, riggar me no igjen for at lokalsamfunn over heile landet skal ha ei lokal transportteneste.

Pasientreisene er ein viktig del av næringsgrunnlaget for drosjene. Med lokale drosjesjåførar som i større grad køyrer ruter på oppdrag for det offentlege, legg me til rette for betre samkøyring og ressursutnytting.

Pasientar skal få ei transportteneste som er tilgjengeleg for dei. Medan drosjesjåførane som sit med lokalkunnskap og omsorg for pasientane dei køyrer, skal få ei løn som er til å leve av.