Biskop Ottar M. Myrseth: Ein pussig diskusjon i kristen-avisene

Ein pussig diskusjon dukka opp denne sommaren i kristen-avisene. Ei mor oppgav som motiv for å forlate Den norske kyrkja at det ikkje var trygt for borna å vekse opp der. Ein professor på NLA røkte etter om «trygg» er eit kjennemerke (sokalla «nota ecclesiae») som kvalifiserer ei kristen kyrkje. Han fann den ikkje korkje i Skrifta eller vedkjenninga. Er dermed alt sagt om korvidt ei kyrkje må vere trygg å vekse opp i?

Jesus tek i Bergpreika oppgjer med mange som vil tilhøyre og representere han og seier: «Ikkje alle.» Ikkje alle som kallar han «Herre» vil han vedkjenne seg. Ikkje alle er pålitelege. Ikkje alle som kallar meg «Herre» vil eg gjenkjenne, seier han. Ikkje alle som reknar seg som Jesus-folk.

Jesus brukar tvillingorda «høyre» og «gjere». Det er somme som høyrer og som vil høyre til, men som ikkje gjer etter det dei høyrer. Splittinga mellom «høyre» og «gjere» riv frå kvarandre ord og handling. Jesus avslører at der er ei tru som ikkje føder gode gjerningar, tre som ikkje ber god frukt.