Burar inne biskop

Den gamle frigjeringshelten Daniel Ortegas brutale regime er blitt eit mareritt for Nicaragua. No går Ortegas tryggingsstyrkar også hardhendt laus på modige prestar og ein biskop.

Ein gong – for vel fire tiår sidan – var sandinistleiar Daniel Ortega ein frigjeringshelt mot eit diktatur i Nicaragua. No er han sjølv i full gang med å gjera landet om til eit nytt diktatur. I ein totalitær kamp mot alle kritikarane og alle miljø som utfordrar makta hans, går Ortega no laus på den katolske kyrkja.

Fredag 19. august tok tungt væpna tryggingsstyrkar seg inn i bisperesidensen i Matagalpa, den sjuande største byen i Nicaragua. Då hadde dei i 15 dagar, sidan 4. august, omringa bispebustaden og nekta både biskop Rolando Álvarez og fleire prestar og andre å koma ut. Ingen slapp heller inn.