Meninger
Det nyttar ikkje å skulda på Ansgar-rektoren!
For kort tid sidan skreiv Dagen at Norges Kristne Råd inviterer til debatt om «likestilling og underordning – kvinners lederroller i kristne menigheter» under Arendalsuka.
Med i panelet skulle det vera både teologar og leiarar frå kristne kyrkjesamfunn, men ingen av dei stod sjølv for eit syn om at kvinna skal underordna seg mannen. Dette tykte eg var oppsiktsvekkjande. Leiaren sa at dei hadde forsøkt å oppspora motstemmer utan å lukkast. Desse forsøka må ha vore halvhjarta, for det har vore mange dyktige motrøyster i debatten i Dagen som kunne ha gjort ein god jobb i debatten på Arendalsuka.
Annonse
Nokre av dei som dei trudde var aktuelle, stod ikkje for ein underordningsteologi. Dette seier meg at det kristne maktapparatet og den teologiske eliten har dårleg kontakt med den kristne grasrota.
Heldigvis var det likevel ei modig kvinne som i debatten stod opp for det Bibelen seier. Berit Hognestad, kursvegleiar i Ungdom i Oppdrag, var ei tydeleg stemme for at kvinner skal underordne seg ektemannen.
Ho sa at dette absolutt var noko å snakka om fordi det etter hennar syn står så tydeleg om underordning i Bibelen. Vi kan ikkje berre oversjå det, sa ho, og kom med mange kloke og gode innspel om emnet. Ho fortener både takk og ære for det ho sa i debatten på Arendalsuka.
Rektor for Ansgar høyskole, Ingunn Folkestad Breistein, innleia underordningsdebatten under Arendalsuka, med desse orda: «Dersom kvinner eller menn ønskjer å underordna seg i Noreg anno 2022, så treng ein ikkje skulda på Gud, ein er fri til å gjera det, men ikkje skuld det på Gud!» Eg vart svært skuffa då eg las dette sitatet av Ansgar-rektoren. Eg hadde venta meir teologisk tyngde enn dette frå Ansgar sin rektor.
Å gå inn under Guds ordning, å underordna seg Herren, inneber trygt vern og stor velsigning.
Guds ordning er eit sentralt emne i Bibelen. Det heng saman med Guds suverene skapargjerning. Gud har gjeve skaparordningar for at både heim og samfunn skal kunna fungera etter hans vilje til det gode for menneska. Det greske ordet for underordning – hypotasso – kjem ut av orda hypo – under, og tasso frå taxis – ordning og betyr i Det nye testamente å gå inn under den ordning som Gud har gjeve. Å gå inn under Guds ordning, å underordna seg Herren, inneber trygt vern og stor velsigning. Like eins fører det til ulukke når vi gjer opprør mot Guds ordningar.
Når vi ein gong skal stå for den store dommaren og gjera rekneskap for livet vårt, nyttar det ikkje å skulda på Ansgar-rektoren for at vi ikkje ville underordna oss etter Guds ord. Vi kan heller ikkje skulda på at vi følgde råd frå den teologiske eliten eller gjorde det som var politisk korrekt. Alle har fått fri vilje, så ingen treng å underordna seg om ein ikkje vil, men du må ta ansvar for det du gjer sjølv. Det nyttar ikkje å skulda på rektor!
