Difor er Impuls så viktig

Å kunne reise på leir og festival har vore verdfullt for unge kristne i generasjonar. No er det viktigare enn nokon gong.

I helga vart det arrangert Impuls i IMI-kyrkja i Stavanger, for første gong etter pandemien. Så stor var interessa at påmeldinga måtte stenge. Det var fullt hus. Den store tilstrøyminga er eit signal om kor avgjerande det er for unge kristne å kome saman.

Det er viktig for ungdomsgenerasjonen som fekk pandemien rett i fleisen og som har gått glipp av så mykje. I avgjerande år, då dei skulle finne ut kven dei var, knyte vennskap og samle minne for livet, var samfunnet nedstengt i lange periodar. Dei vart sende heim til isolasjon og digital undervisning. No treng dei å ta igjen det tapte.

Det er viktig for unge frå distrikta. Dei som høyrer heime i små kyrkjer og bedehus, og som må ta mykje ansvar, men ikkje alltid får like mykje påfyll, og som saknar kristne arrangement med skikkeleg trøkk i.

Det er viktig for dei som er åleine kristne i klassen, som kjenner seg annleis og stadig må forsvare seg i ei tid då kunnskapen om kristen tru minkar og mange ser på kristne med skepsis.

«Det kjennest så trygt å vere her. Ein slepp å tilpasse seg, slik ein må heime», seier ei jente på Impuls til Dagen. «Her er vi plutseleg ein majoritet. Eg kjenner meg mykje friare her», seier ei anna.

Over 2.000 ungdommer på kristen konferanse: – Her kan vi være frie

Dei korte sitata seier noko om kor verdifullt det er å kome til ein festival som Impuls, eller UL eller nyttårsleiren til KRIK, og få kjenne at ein er del av ein stort kristent fellesskap. Få eit glimt av det svimlande faktum at ein er del av ei kristen kyrkje, som ikkje berre femner om heile regionen, men landet og verda. Så ein kan reise heim med nytt frimod og vissa om at ein ikkje er åleine.

Festivalane er også viktige som ein god plass å ta med kompisar. Ein plass ein kan invitere til og seie «kom og sjå». Mange titals unge gav til kjenne at dei vil følgje Jesus i helga.

Og dét er det viktigaste: At dei unge får eit møte med Jesus. At dei blir utfordra til å ta eit standpunkt for livet. Og at unge får solid forkynning, anten dei er nye på vegen eller har trudd på Jesus så lenge dei kan hugse. Slik at dei, som Impuls-leiar Halvor Lindal seier er målet for festivalen, kan utrustast til å bli trygge i sin identitet i Jesus og til det livet dei opplever at Gud kallar dei til.

Britisk evangelist talte til norske ungdommer: – Jeg ser folk her som er sultne på Gud

Dei er ein generasjon som stadig er pålogga på sosiale medier, og som ifølge Impuls-talar Mike Pilavachi er under sterkt press og verkar å streve ekstra mykje med angst, fortviling og mental helse. Han er ikkje åleine om slike observasjonar. Men også for denne generasjonen gjeld det at møtet med Jesus set fri. Det er som Pilavachi seier, at ein må formidle kven ungdommane er i Kristus.

Det er verd å merke seg at den røynde britiske forkynnaren også utfordrar foreldregenerasjonen. Han minner om at dei unge ser på oss vaksne og testar oss. «Difor er det så viktig at vi ikkje berre forkynner evangeliet, men faktisk lever det», seier han.

Om dette kan det seiast mykje. Men eit godt døme på vaksne som ikkje berre vitnar med ord, men også med hender og haldningar, er Marit Hodne og Kirsti Wittingsrud Berge, som var blant dei mange frivillege på Impuls. Dei to har sjølve barn som har vore og er aktive i Impuls og hevdar bestemt at dei får meir igjen enn dei gir, når dei står heile helga i kafeen.

Måtte Hodne, Berge og dei andre frivillige inspirere andre til å gjere like eins. Kristen-Norge treng mange som dei, så også nye generasjonar kan få reise på leir og festivalar, få høyre evangeliet om Jesus og bli trygge i trua.

Frivillige på Impuls jubler over responsen: – Jeg begynner å grine