Difor gir eg ikkje opp Den norske kyrkja

Det står ei kvitmåla kyrkje i Selje, med utsikt mot himmel og hav. Her vart besteforeldra mine vigde og oldeforeldra gravlagde.

Det står ei kyrkje på Leikong, kvit den óg. På kyrkjegarden er grava til bestefar som eg aldri møtte, og bestemor som døde då eg var fem.

Det står ei kyrkje på Ask på Askøy, der eg vart døypt og innskriven i dåpsattesten som Fure av presten Seljevoll. Ut over at ask, fure og selje(voll) vart mange treslag i ein og same barnedåp, har eg ingen minner herfrå. Foreldra mine påstår dei flytte til meir grisgrende strøk då eg var eit halvt år, fordi naboen klaga over at eg skreik så fælt.