Eg har ikkje klaga Braut for å ha «svikta» nokon eller noko

I Dagen 27.08. har Bernt T. Oftestad eit innlegg der han gjev mykje plass til ein omtale av mitt innlegg 17.08.24., som har utgangspunkt i Sofie Braut sitt oppbrot, frå Den norske kyrkja (Dnk). Det er interessant at Oftestad har slikt engasjement i situasjonen innanfor Den norske kyrkja.

Det som eg kjende trong til, då eg skreiv innlegget mitt, var å seie noko om kva den lutherske vedkjenninga seier om kva kyrkja er. Og på det grunnlaget ville eg målbere ei von om, og ei tru på, at det framleis må vere mogleg å skape eit samhald i kyrkja med det målet å halde fast på det som Skrifta og vår vedkjenning seier i møte med tankar og praksis i tida.

I den samanhengen brukte eg subjektet «vi». Med dette vender eg meg heilt enkelt til dei som tenkjer som eg, og som kjenner den same trongen. Det var altså mi hovudsak å seie noko til dei som enno vil verte ståande som lutheranarar innan for Den norske kyrkja og halde fast på vedkjenninga. Dette er det «vi» eg vender meg til.