Ein meiningslaus dom

Ei kvinne frå Nordmøre er dømt til å betale bot fordi ho har drepe fleire hundre myser med ei sjølvkonstruert musefelle. Kvinna brukte bamsemums til å lokke mus til ei bøtte med vatn. Nå er ho dømd og fått ei bot på kr. 6000.

Eg tykkjer det er ein meiningslaus dom.

Eg har ein rammeverkstad der eg har ei elektrisk gjæringssag. Det er og avsug for sagesponet. Ein dag eg brukte saga gnistra det i avsuget og eg oppdaga at det har vore myser på ferde. Dei hadde gnaga av isolasjonen i ein halvmeters lengd så koparen var synleg. Heldigvis oppdaga eg det. Her kunne det teke skikkeleg fyr og etterfølgjande millionbrann med uforklarleg årsak.

Myser kan vera effektive brannstiftarar.

Denne musefella som kvinna vart bøtelagd for er effektiv i kampen mot skadedyr. Noko særleg dyrplageri er det ikkje i forhold til det som skjer elles i naturen. Når ein katt tek ei mus så er det seigpining og når ulven riv i hel sauer så er det ikkje nett «humant».

Det er farleg når folk får denne tanken at alle dyr skal ha sin «rettmessige plass» – også skadedyr.

I India har vi hinduismen og dermed trua på sjelevandring. Du kan bli atterfødd i ein annan skapning. Difor må ein ikkje ta livet av dyr. Det har m.a. ført til ei enorm rotteplage. Ein stad var dette så ille at dei måtte fanga så mange rotter som mogleg – for så å sleppa dei ut att ein annan stad. Nei, ein kunne ikkje ta livet av dei.

Bibelen lærer oss at mennesket står over naturen og den skal forvaltast til menneske sitt beste. Men dersom kristendom ikkje lenger pregar samfunnet, vert dette snudd på hovudet. I staden for eit religiøst forhold til Gud, så får ein eit religiøst forhold til naturen.

Har du høyrt uttrykket «moder jord»? Alt skal vernast – også skadedyr. Dei skal også ha sin «rettmessige plass». Vi kjem nok til å sjå meir av dette etter kvart.

Domen på Nord-Møre må omgjerast snarast råd.