EU er ein del av løysinga

I ein nyleg publisert kronikk skriv Senterpartiets leiar Trygve Slagsvold Vedum at «dette ikkje er tida for ein ny EU-kamp», og argumenterer for at Arbeidarpartiet og Høgre må slå fast at det ikkje er aktuelt å starte ein medlemskapsprosess dei neste fire åra.

Det er ikkje overraskande at EU-motstandaren Vedum vil leggje lokk på EU-debatten. Han har fått med seg at stadig fleire nordmenn seier ja til EU, og vil difor gjere sitt for å hindre at folket får ta stilling til norsk EU-medlemskap gjennom ei folkerøysting.

Etter mitt syn er det både feigt og uansvarleg å avlyse EU-debatten når me ikkje veit kva me har i vente. Dei siste vekene har det for alvor gått opp for oss at verda slik me kjenner ho er i endring, og då må me tilpasse oss for å bevare samfunnet vårt og verdiane me set høgt.