Farleg feil om forfølging av kristne i Syria

Dagen har spreidd misvisande rapportar om situasjonen for kristne i Syria. Slike rapportar kan gjera situasjonen endå farlegare for redde syriske kristne.

Ein tittel i Dagens nettutgåve lydde frå onsdag kveld til langt utpå torsdag: «Barth Eide om kristenforfølgelser: – Syria er i en kritisk fase.» Der fekk den kristne avisa det til og med til å sjå ut som at utanriksministeren er kjelde for at sivile kristne har vore og er utsette for massiv, dødeleg vald vest i Syria.

Dette er ikkje sant. Alt som elles var rett i innhaldet, måtte lesast i lys av ei sterkt misvisande overskrift om at det var kristne som var målet for massakrane. Dei som faktisk blei massakrerte, sivile alawittar, blei dessutan knapt nemnde med eit ord.