| Debatt
Fasteaksjonen: Motlaus? Saman kan vi gjere ein skilnad
Det er lett å verte motlaus i ei verd med krigar, katastrofar og klimaendringar. Konfirmantane våre er i desse dagar med å løfte fram heilt konkrete løysingar. Desse gir mat, vatn og økonomisk tryggleik til menneske som treng det – og du kan bidra!
FASTEAKSJON: Ved hjelp av ganske små dropar vatn og dryppirrigasjon kan det vekse planter. Her fyller Prevencia frå Zambia vatn i bøtter, og vatnet blir ført ut gjennom tynne slangar til plantene.
Foto: Kirkens Nødhjelp
Kvar einaste dag ser vil bilete og overskrifter som minner oss på ei uroleg verd: Krigane i Midtausten pregar dei daglege nyhenda. Ukraina-krigen har gjort det same no i tre år. Langt mindre merksemd får krigar andre stader i verda. Dei er der like fullt, og den største humanitære krisa i verda er faktisk Sudan. Samstundes kjem meldingane om ekstremvêr stadig oftare.
Kva kjensler vekkjer desse inntrykka i deg? Sinne, fortviling? Eller kanskje maktesløyse?
Det er lett å kjenne seg handlingslamma i ei slik verd. Difor er det godt å vite at vi faktisk kan gjere noko her frå Noreg. Vi har nemleg klare døme på korleis heilt konkrete løysingar på bakken mange stader i verda kan redde liv. Ikkje berre som naudhjelp der og då, men som langsiktige endringar som hjelper menneske ut av fattigdom. Vi har sett håp i ein drope vatn – bokstavleg tala.
