Kronikk
TRUSFRIDOM?: På vesle julaftan vedtok parlamentet i nok ein delstat – Karnataka – ei lov som kriminaliserer konverteringar frå hinduisme til kristen tru, skriv Johannes Morken. Her er indiske kristne samla utafor ei kyrkje etter å ha delteke i ei julemesse i Gauhati, India, 25. desember 2021.
Anupam Nath / AP /NTB
Feira jul i frykt
Medan vi feira jula i fred, feira kristne i fleire av Indias delstatar høgtida i frykt for hindunasjonalistiske valdskrefter.
Ein serie julefeiringar vart saboterte, fleire statuar av Jesus vart smadra og nissedrakter vart brende. Hindunasjonalistiske grupper påsto at kristne brukte julehøgtida til med tvang å konvertera hinduar, melder The Guardian. I år var omfanget av angrep endå større enn i tidlegare julefeiringar.
På vesle julaftan vedtok parlamentet i nok ein delstat – Karnataka – ei lov som kriminaliserer konverteringar frå hinduisme til kristen tru.
Før lova vert endeleg vedteken, må ho gjennom Overhuset. Der har det hindunasjonalistiske partiet BJP – som regjerer både India og Karnataka – ikkje fleirtal. Difor kan det henda at delstatsregjeringa set lova ut i livet som ei mellombels lov, i håp om at BJP får fleirtal i Overhuset etter neste val og då kan vedta lova som permanent.
