Debatt
KYR: Beiting er undervurdert som klimavenleg matproduksjon, ved at vi kan auke karbonbindinga i jorda vesentleg, skriv Jenny Klinge.
Bård Løken / NPK
Fredspipa ligg klar, Gunhild Stordalen!
Ein av mine kjepphestar er at vi ikkje kan jamføre norsk husdyrhald med industrialisert landbruk i utlandet.
I den offentlege debatten om klima, kjøtt og kosthald spissar det seg fort til. Gunhild Stordalen og eg har hatt ein skikkeleg runde om temaet, og vi kjem garantert til å halde fram med å diskutere. Men no meiner eg rett og slett at det er på tide å røykje fredspipe med Stordalen.
Kritikken min mot Stordalen har mellom anna gått på det generelle rådet om å eta mindre kjøtt for klimaets del i eit husdyrland som Norge. Vi deler likevel mange verdiar og målsetningar.
Eg tykkjer det er flott at ho har besøkt min gode kollega Per Olaf Lundteigen på garden hans for å lære om og diskutere matproduksjon i den norske naturen og på norske ressursar. Eg opplever at ho i stadig større grad ser verdien av det norske landbruket – «trass i» at det består av mykje husdyrhald.
