Frimodig kyrkje si hovudsak at kyrkja er lokal

Karl Øyvind Jordell skriv i Dagen om kyrkjevalet (22.1. og 9.2.), og refererer til «de partier som går til valg med program for å få valgdeltakelsen ned». Og partia han siktar til er Bønelista og oss i Frimodig kyrkje.

No er det ikkje slik at Frimodig kyrkje har programfesta at vi ønskjer å få ned valdeltakinga ved kyrkjevalet. Kor høg valdeltakinga er ved kyrkjevalet er rett og slett ikkje det vi bryr oss mest med.

Derimot ønskjer vi at kyrkjedemokratiet skal forankrast i dei lokale kyrkjelydane, og i fellesskapet av dei som samlast til gudsteneste. Programmet vårt går inn for direkte val til sokneråd i kyrkjelyden sine lokale, og som hovudregel i tilknyting til gudstenestefeiringa, og deretter val til bispedømeråd og kyrkjemøte gjennom sokneråda.

Drop-in-dåp og kirkevalg. Dette er Den norske kirkes kampanjer i år

Eg påstår ikkje at vi har funne den perfekte modellen for kyrkjedemokrati, og eg trur Jordell har rett i at valdeltakinga vil bli lågare med vår modell. Men eg meiner det er betre å la den lokale kyrkjelyden med sine gudstenester vera grunncella, heller enn å basera kyrkjedemokratiet på ei partimobilisering kvart fjerde år.

Den såkalla «demokratireforma» i kyrkja har gitt oss høgare valdeltaking, blir vi minna om. Likevel var det ved sist kyrkjeval (2019) over 87 prosent av dei potensielle veljarane i kyrkja som ikkje brukte røysteretten.

Dagens modell, som altså ikkje er den Frimodig kyrkje ønskjer, har gitt oss eit kyrkjeval med stemmelokale vegg i vegg med dei politiske vala. Det er ein modell som minner om eit samfunn med statsreligion. I eit ope og pluralistisk samfunn er det ein ganske underleg ting å leggja val i eitt trussamfunn så tett opp til dei partipolitiske vala i storsamfunnet.

For Frimodig kyrkje er det ei hovudsak at kyrkja er lokal. Kyrkja er dei levande fellesskapa av menneske som kjem saman til gudsteneste, nattverd, bøn og kristen teneste i lokalsamfunnet. Dette fellesskapet vil vi løfta fram, saman med tilliten til Guds ord som høgaste autoriteten for tru, lære og liv i kyrkja.

Vi vil at kyrkja skal gjera folk til læresveinar. Og det er eit arbeid som først og fremst må gjerast i nærmiljøet – gjennom evangelisering, søndagsskular, Alpha-kurs, språkkafear og språkhjelp, ungdomsarbeid, bibelundervisning, kor og kultur, og mange typar diakonalt arbeid. Slike ting er det kyrkja må prioritera. Slik blir kyrkja bygd nedanfrå.

Tror dialog mellom liberale og konservative kan styrke troen hos begge parter

I Frimodig kyrkje vil vi gje den lokale kyrkjelyden større makt og større ansvar, ikkje berre gjennom valordninga. Valprogrammet vårt trekkjer fram fleire konkretiseringar av dette, m.a.:

• Prioriter økonomiske ressursar mest mogleg ut til dei lokale kyrkjelydane, og hald administrasjonen på sentralnivå og bispedømenivå på eit minimum.

• Gje dei lokale kyrkjelydane rom for å ha ulik profil.

• Gje den lokale kyrkjelyden ei sterkare stemme ved tilsetjing av prestar.

• Legg stor vekt på lokalt votum ved bispeutnemningar.

Så når vi i Frimodig kyrkje denne gongen – etter ganske mykje tvil og nøling – stiller lister ved kyrkjevalet, er ei av hovudsakene våre å satsa på dei lokale kyrkjelydane.