Debatt
Gartnarutdanning for vaksne
Vestland Senterparti ynskjer å endre vaksengartnarutdanninga til gammal opplæringsmodell med full opplæring i vidaregåande skule.
Vaksengartnarutdanninga før 2022 var ein stor suksess, mellom anna fordi ordninga gjorde det lettare å kombinere skule med jobb og familieliv. 70 prosent av dei som utdannar seg til gartnar nyttar seg av ordninga for vakse, noko som viser kor viktig ordninga er og har vore.
Annonse
Endringa av vaksengartnarutdanninga til eit 2+2-løp gjer det vanskelegare for vaksne å ta og fullføre gartnarutdanninga. Senterpartiet er uroa for at dette medfører ei svekking av utdanninga og at det vert utdanna færre gartnarar. Søgne vgs. har allereie signalisert at dei ikkje ynskjer å tilby vaksengartnarutdanning om ikkje utdanninga vert endra. Det er alvorleg.
Frukt-, bær- og grønsaknæringa i Vestland har stort potensial og har trong for kvalifisert arbeidskraft no og i framtida. Som eigar av ein av dei tre skulane som tilbyr vaksengartnarutdanning i Noreg, Voss vidaregåande skule, er det viktig at Vestland fylkeskommune er tydeleg på at me treng ei framtidsretta gartnarutdanning som vil bidra til meir kvalifisert arbeidskraft for ei særs viktig næring i fylket vårt.
Difor meiner Senterpartiet det er viktig at fylkestinget i Vestland sender eit tydeleg signal om at me ynskjer å endre vaksengartnarutdanninga til gammal modell.
