| Debatt
Gaza – folk, fred og krig
FLYKTNINGAR: Det er slik at det aller meste av folket i Gaza er definerte som flyktningar, og deira flyktningstatus – saman med alle flyktningar frå Israel – er definert på ein annan måte enn for alle andre flyktningar, skriv Johannes Kleppa.
Abdel Kareem Hana / AP / NTB
Området som Gaza utgjer, har vore eit uroleg område i uminnelege tider. Frå Israel vart oppretta i 1948 og fram til i dag har det stadig vore terror, intifada og krig knytt til denne vesle landstripa. Det er eit uhyre lite område geografisk sett, og det er ikkje stor folkesetnad heller, sjølv om folket bur tett.
Det er utruleg at eit slikt lite og uroleg område skal påkalla nesten heile verda si merksemd. Den eine statsleiaren etter den andre har sett seg som mål å ordna opp, men ingen har klart det. No er det president Donald Trump som er på banen, og som vanleg på anna vis enn alle andre.
Eg skal ikkje ha sterke meiningar om Trump sin plan og realismen i denne, men eg vil reflektera litt rundt situasjonen. Alle initiativ og planar til no har gått omtrent i same sporet, og det er å byggja på det som er i Gaza, og det inkluderer Hamas. Dette har vist seg å vera dødfødt. I Vesten er det likevel stor vilje til å gå vidare på same vegen, og Noreg synest å vera utan evne til å tenkja i nye banar.
