Heider til bestemødrer i Sunnfjord

Vi må berre ta av oss hatten for bestemødrer i Sunnfjord. Saman med likesinna andre stadar i landet, har dei bretta opp armane for å gå i krig for freden. Den vi har teke for gjeven, noko som ikkje lenger er så openbert. Utryggje krefter er på bana i Ukraina, i Israel og på Gazastripa.

Gruppa bestefedrar, som eg tilhøyrer, er av det meir saktegåande slaget. Å gjere meir enn ein ting om gongen, er ikkje lett. Det skal bringast mat og ved i hus. Så måkast. Deretter ein kvil. Ja, ete fyrst. Damene, bestemødrer i denne samanhengen, makter å halde fleire ballar i lufta samstundes. Reine sirkussjonglørane, eg vert imponert.

Når vi frå det andre kjønnet vakner av svevnen, guffar vi på. Berre så det er sagt. Vi veit korleis dette skal handsamast strategisk sett. Lygna utgått frå Kreml til russarane skal avdukast. Dei prøver å framstille Vestens folk som slike som trugar deira eigne verdiar, som eit påskot for å kunne angripe.