Humpete resonnement om Hegertun frå redaktør Gilje

Redaktør Gilje har 18.1. nokre tvilsame resonnement i omtalen av Hegertuns ekteskapssyn. Han er skeptisk til ordet «liberal». Vel, ordet har med «fri» å gjere, men kan definerast vidt. La oss derfor droppe det ordet og heller teste Giljes resonnement på det meir spissa uttrykket «fri eller ulydig overfor bibelsk rettleiing».

Han samanliknar med at synet no er friare på 1) dødsstraff, 2) prevensjon, 3) skilsmisse 4) kvinnelege prestar, 5) gjengifte og 6) kyrkjetukt. No har vel ikkje NT noka klar rettleiing om 1, 2, 3 og kanskje 4, så det er ikkje gode samanlikningar.

Men om 5 og 6 skulle vel NT vere klar nok. Og da blir spørsmålet: Er ulydnad der ein god grunn til å utvide ulydnaden også til 7) ekteskapet? Det burde vel vere omvendt?

Så spør Gilje kva som er bibeltruskap ved 8) å forsvare retten til å ha vårt høge velstandsnivå. Svaret er «ingenting», og det er sikkert Gilje samd i. Og så?

Så spør han kvifor ikkje det blir debattert like ofte som NTs ekteskapslære.

In casu gjer vi det siste fordi ei bok nyleg har hevda at vi må sjå bort frå bibelsk rettleiing. Elles får mange menneske det vondt.

Skulle det no komme ut ei bok som hevda at vi må sjå bort frå bibelsk rettleiing om velstanden fordi mange menneske elles ville få det vondt, ja, så ville vi vel òg få ein hyppig debatt?

Og først da blir ei slik samanlikning relevant.