I omlag 65 år har eg vore vitne til dette endetidshysteriet

Etter mange år med fred rasar krigen på ny i Europa. Russland har gått til ein brutal krig mot Ukraina. Forferdelege bilete om bombing og øydelegging fyller skjermane våre.

Vi ser hjarteskjerande scener frå folk som flyktar frå krigen. Barn blir skilde frå foreldre og mange sivile blir drepne i krigshandlingane. Vi er alle forferda over at dette kunne henda i vår tid.

Endetidsprofetane kjem på ny på banen. Gamle profetiar om krig og undergang blir på ny trekt fram. Vi høyrer at krigen i Ukraina kan vera opptakten til det store slaget ved Harmageddon i Israel.

Gog og Magog som Esekiel profeterer om kan vera Russland og Putin, får vi høyra. Kongane frå aust - kinesarane - kjem også inn i dette negative biletet som mange måler for oss i desse dagane. Mange blir skremd av den pessimistiske framstillinga som vi møter i dag av dei siste dagar.

Eg har høyrt det før. Kvar gong det er ei krise eller ei katastrofe kjem dei pessimistiske profetiekspertane på banen. I omlag 65 år har eg vore vitne til dette endetidshysteriet, men ingen av spådommane om templet i Jerusalem, antikrist, dyret, fellesmarkedet (EU) - det gjenreiste romarriket, Gog, Magog eller Harmageddon har blitt oppfylt slik det vart framstilt av folk med eit dispensasjonalistisk endetidssyn. At dei aldri lærer, tenkjer eg, kvar gong dei tolkar politiske hendingar i lys av sine pessimistiske forventingar om endetida.

Den store feilen mange gjer når dei skal tolka profetiane i Bibelen, er at dei tek dei ut or samtida og samanhengen. Dei kjenner ikkje historia, som dekkjer 2000-3000 år tilbake i tid, og som viser at desse profetiane alt har fått i historiske oppfylling i Israel.

Svært mange av dei i samband med øydelegginga av Jerusalem, slik Jesus sa. Fordi dei ikkje kjenner historia, trur dei at alt handlar om framtida. Det som var ei profeti om lokale hendingar i Midt-Austen blir forstått som noko som skal omfatta heile jorda i dei siste dagar, heilt imot den framstillinga Bibelen gjev oss.

Bibelen teiknar eit svært håpefullt bilete av dei siste dagar. Barnet, som vart fødd i Betlehem, er Underfull rådgjevar, Veldig Gud, Evig far, Fredsfyrste. Herreveldet hans skal vera stort og freden utan ende, for hans rike veks og utvidar seg heile tida (Jes 9,6-7).

Rettferda skal spira i hans dagar og freden vera stor til månen forgår. Han skal la dei verjelause få sin rett og berga dei fattige.

Han skal styra frå hav til hav og alle folk skal tena han. Slekt etter slekt skal bli velsigna av han, for han skal løysa folk frå tvang og vald. All jorda skal fyllast med hans herlegdom (sjå Sal 72).

Heile Bibelen er gjennomsyra av tanken om framgang for Guds rike som vil fylla jorda med rettferd, fred og velstand. Mørkets rike er på vikande front og skal ifølgje Jesus ikkje kunna stå seg i mot Guds forsamling, langt mindre få makt over henne. Sanning og trufast kjærleik skal lyftast opp, medan løgn, utruskap, urett og vondskap skal koma i miskreditt.

Guds rike skal gå fram på ein slik måte at det bibelske verdsbiletet blir rådande. Verdiane i Guds rike skal gjennomsyra alle område i samfunnet. Denne forvandlinga vil omfatta politikk, media, vitskap, næringsliv, utdanning, kunst, kultur og alle andre samfunnsområde og funksjonar.

Forandringa vil koma av at Guds rike blir forkynt og demonstrert i Den heilage andes kraft, med under og teikn som set menneske fri frå synd og urett og gjer dei til nye skapningar. Guds rike skal vinna! Det har Gud lova!

Då profetane kom med sine oppmuntrande profetord om framgang for Guds rike og frelsande forvandling av verden, var dei ein liten minoritet. Dei var ein del av eit lite mindretal i folket sitt som tilbad Gud og sette sin lit til han midt i motgang og vanskar.

Det håpet som Gud hadde gjeve dei, heldt dei oppe i uro og strid. Dei såg fram til ei tid då jorda ville vera fylt av lovsong og tilbeding til Herren. Eg er glad for å leva i ei rik misjonstid der lovsongen stig frå fleire og fleire folk og nasjonar over heile verda.

Menneskelege spekulasjonar om endetida gjer folk passive og pessimistiske. Det bibelske håpet motiverer oss til å følgja Jesu eksempel ved å hjelpa menneske på flukt, forkynna evangeliet om Guds rike og gje folk håp og tru i liding og krig.