KRISTEN BY: Mange møtte fram då paven gjesta Karaqosh, den største kristne byen Irak, søraust for Mosul.
Ivor Prickett / The New York Times / NTB
Irak som eit kristent museum?
Kan pave Frans si historiske og kraftfulle reise ha hindra at Irak blir eit museum over 2000 års kristendom?
Kristne frå alle kyrkjesamfunn helsa pave Frans varmt velkommen i Irak. Det låg sterk moralsk kraft i at 84-åringen hadde mot til å reisa til eit i seg sjølv utrygt land – og det midt under pandemien. Dette var den første reisa nokon pave gjorde til Irak, og den første reisa paven gjorde under pandemien.
Paven fekk plassert Iraks forfølgde og gløymde kristne i internasjonale mediekanalar med eit kraft ingen andre klarar. Han kunne sagt det frå Roma, men valde ei langt frå risikofri solidaritetsreise.
Irak har bibelsk historie tilbake til Abraham og 2000 års kyrkjeleg historie frå apostlane. Den kristne minoriteten som har vore utsett for mange prøvelsar gjennom hundreåra, vart for alvor liten i åra etter den amerikanske invasjonen i 2003 og borgarkrigen som følgde – og etter IS-bestialiteten.
