| Frispark
Ja til livshjelp, nei til dødshjelp
JA TIL LIVSHJELP: Personar med alvorleg sjukdom og kort forventa levetid må vere heilt trygge på at dei vil få den beste lindrande behandlinga og ei heilskapleg omsorg i livets slutt, skriv Kjerst Toppe.
Illustrasjonsfoto: Adobe Stock
Debatten om aktiv dødshjelp er igjen på dagsorden i Norge. I dag er det berre Framstegspartiet som har vedtatt å tillate dødshjelp. Men i fleire parti er det omkampar på gong (NRK 21.10).
Døden er ikkje nødvendigvis ein ven som kjem når vi er klare og mette av dage. Individet sin fridom og rett til å velje står høgt i vårt samfunn. Men er det likevel ein menneskerett å få hjelp til å døy?
Om aktiv dødshjelp blei innført i Norge – korleis vil det vere å leve med ein diagnose som myndigheitene meiner kvalifiserer til dødshjelp? Det kan vi tenkje oss til. Konsekvensane kan vera at menneske med store behov og deira familiar vil kjenne på press. Dei vil få eit alternativ. Døden. Dei kan velje å ikkje vere ei «byrde» for samfunnet lenger.
