Kronikk
TIL MINNE: Av jødane på Nesjestranda vart Tibor, Vera, Nora Lustig og Robert Weinstein drepne i dødsleirane. I dag er lagt «snublesteinar» over dei ved Skåla skule på Nesjestranda og minnestein på kyrkjegarden på Sølnes kyrkje.
Dag Skarstein / Romsdal sogelag
Jødebarna Tibor og Vera – og deres skjebne
Gjennom denne vesle boka er det reist ein bauta over små og store gjerningar som var gjort av modige medmenneske, enkeltpersonar og lokalsamfunn, for å prøve å berge to barn.
I koronatid har det vore nødvendig å samle seg heime. Såleis har det blitt ekstra høve til å ta fram litteratur og søkje inspirasjon i bokheimen. I løpet av denne tida er det gitt ut mange nye bøker med ettertankar, tidsminne og viktige historier om Andre verdskrig som tidlegare ikkje er fortalt.
Nettopp i koronatid omhandlar mange av desse bøkene bodskap me treng – om betydninga av kvar enkelt sine handlingar, om små gjerningar som får stor innverknad, om kraft som oppstår ved å dra lass i lag og om enkeltmenneskets mot til å yte der det ikkje finst opptrakka løype å gå i.
Ei slik bok er Sverre Kragset si forteljing: «Krig og hverdag. Jødebarna Tibor og Vera – og deres skjebne», gitt ut på Z-forlag. Forfattaren seier innleiingsvis at «det må fortelles hele tiden». Det gjeld lagnaden for menneske som blir sett utanfor og trua – i dette tilfellet jødane under nazi-veldet. Boka fortel om to jødiske barn som kom til Romsdalen under krigen og om alt som blei gjort for å prøve å berge dei.
