Jubileum for dei mange

Vebjørn Selbekk meiner at kristningsjubileet står i fare for å bli avkristna. Eg er forundra over at han slik snakkar ned denne heilt sentrale delen av Nasjonaljubileet 2030. Det er ikkje min intensjon. Men eg ynskjer at kristningsjubileet skal vere eit samfunnsjubileum med rom for mange stemmer. Som ikkje berre blir viktig for kristen-Norge, men for heile vår nasjon.

Difor har regjeringa bestemt at det skal setjast ned ein nasjonal komité for dette samfunnsjubileet.

Den nasjonale komiteen skal leiast av stortingspresidenten. Selbekk gjer ein poeng av at Masud Gharahkhani er muslim. Eg trur Selbekk forstår at det ikkje er difor Gharahkhani skal leie komiteen. Det er vervet han har i dag, altså stortingspresidentvervet, som skal representerast i komiteen heilt fram til 2030. Eg meiner det er eit poeng at denne jubileumsfeiringa nettopp blir forankra i Stortinget.