Kan feiringa av Norges kristning verta for kristen?

Sjølv om det er fleire år før me skal feira slaget på Stiklestad og med det kristninga av Norge, skal regjeringa ha ros for at førebuinga alt er i gang. Og det er statsråd Kjersti Toppe som no får hovudansvaret for feiringa.

I folkeskulen lærte eg at både Håkon den Gode og Olav Trygvason ville «kristna» Norge, men det var Olav den Heilage som fullførte det då han vann slaget på Stiklestad. Derfor har me Olsok som ein nasjonal minnedag. Per Sivle har eit vakkert dikt om slaget på Stiklestad. I eit av versa lyder det: «Og merket det stend om mannen han stupe.»

Det ville vera ei grov forenkling og nærmast ei historieforfalsking om ikkje kristendommen får ein brei plass i dette jubileet. Derfor synest eg det er merkeleg at Human-Etisk Forbund er redd for at markeringa kan verta «for kristen».

Me veit at religionen er viktig når me omtalar land, og landa i Europa vert definerte som kristne land.

Grunnlova vår seier i §2 at «verdigrunnlaget skal framleis vere den kristne og humanistiske arven vår». Og både fedrelandssong og fedrelandssalme har sterke uttrykk som knyter Norge til kristendommen, f.eks. «Du sende ditt ord til Noregs fjell, og ljos over landet strøymde». Denne realiteten må Human-Etisk Forbund erkjenna og såleis godta at kristendommen får ein rettkommen og brei plass i feiringa.

Eg er óg viss på at Den norske kyrkja, andre kyrkjesamfunn og andre organ vil komma med gode innspel til markeringa.

Så lukke til med arbeidet, Kjersti Toppe!

Knuser myter før kirkelig 1000-års-jubileum: – Kristningen startet lenge før Stiklestad