KrF sitt svik mot pelsdyrbøndene
KrF har sett pelsdyrbøndene i ein svært vanskeleg situasjon, og det ser ut som om KrF helst ikkje vil snakka om saka.
Etter retningsvalet til KrF har det ikkje gått så bra so langt, ifølge meiningsmålingane. Dagen-redaktør Vebjørn Selbekk var klinkande klar i ein kommentar på TV. Dersom den såkalla raud side vinn, ser KrF 2-talet veldig fort.
Men slik vart det ikkje. Likevel kan retningsvalet visa seg å verta dramatisk for KrF. Kva no?
Annonse
Det er to saker som gjer at eg for tida er rådvill kvar mi røyst går i valet 2021: Den eine er at KrF gjekk i regjering med Frp, stikk i strid med det dei lova i valkampen.
Den andre er KrF sin aksept for avvikling av pelsdyrhald i Noreg, som er eit brot med eige program.
I den siste saka både trur og veit eg at KrF har mist medlemer, og trur også veljarar, ikkje minst i distrikts-Noreg, der KrF har stått sterkt lenge.
Denne saka er ei skam for KrF. Difor har eg, enn so lenge, ikkje fornya mitt medlemskap.
No kan KrF kanskje hanka innatt fleire av desse veljarane ved å ta grep for å gje eit rettferdig økonomisk oppgjer til alle pelsdyrbøndene, dei som trass stortingsfleirtal om framleis drift, brått fekk stoppordre for ei lovleg næring.
KrF har sett desse bøndene i ein svært vanskeleg situasjon, og det ser ut som om KrF helst ikkje vil snakka om saka i det heile i staden for å setja eit rettferdig KrF-stempel på oppgjeret til desse bøndene.
Det tek månader og år før desse bøndene får eit skikkeleg svar på kva som no skjer. Det måtte eit Frp ut av regjering før det vart litt fart og debatt i saka og eit fleirtal i Stortinget som sa sitt.
Med eit skikkeleg oppgjer, som KrF bør gå i brodden for, kan partiet kanskje vinna attende tapte medlemer og røyster det kan sjå ut som sårt trengs for å bikka sperregrensa.
Annonse
Måten KrF har behandla desse bøndene på, stemmer ikkje med KrF sine grunnverdiar og program.
Det har vore mitt parti heile livet, så skuffelsen og undringa over KrF si handsaming av denne saka har vore stor.
Mottoet «menneskeverd i sentrum» kling hult på grunn av denne saka. Den har øydelagt mykje meir for partiet enn leiinga i Oslo har vilja erkjenna, trur eg.
Men, det er enno nokre månader att til valet. KrF kan framleis koma med eit oppgjer som gjev rettferd til desse bøndene.
KrF sit med landbruksministeren som bør setja si ære og all si politiske makt bak kravet om ei rettferdig og rask avklaring i saka. Desse bøndene skal, om mogleg, koma skadeslause ut av denne krisa som KrF har vore med og påført dei.
Det undrar meg stort om så ikkje skjer.
