Debatt
TILTALT: Burdin (biletet) er tiltalt for «blasfemi mot helgenar» og «blasfemi mot kyrkja», for å ha «bakvaska og ærekrenkt» kyrkja og spreidd klagemål om «brotsverk som ikkje er gjort», skriv Johannes Morken.
Stefanusalliansen
Krigskritisk prest skulda for blasfemi
«Kyrkja spreier farlege åndelege vrangforestellingar», skreiv den krigskritiske ortodokse presten Ioann Burdin. No blir han skulda for å spotta kyrkja.
Den russisk-ortodokse presten Viktor Ioann (Johannes) Burdin blir truleg frådømt retten til å vera ortodoks prest. Burdin blir 16. juni stilt for ein kyrkjeleg domstol: Han vert tiltalt for «blasfemi mot kyrkja» fordi han har kritisert krigen og patriark Kirills støtte til krigen i Ukraina. Saka går for tribunalet i Kostroma bispedøme der Burdin inntil for eitt år sidan var sokneprest – i landsbyen Karabanovo. Burdin stiller ikkje i retten for å forsvara seg.
– Alle klagemåla er politiske og har ikkje noko med kyrkja og med teologi å gjera, forklarar Burdin i eit intervju utført på Telegram. Han kom seg, etter å ha fått visum, for få veker sidan til Bulgaria saman med familien. Han var vel vitande om at han risikerte nye kyrkjelege sanksjonar og deretter straff for å «ha diskreditert hæren».
Berre timar etter Putins fullskala invasjon i Ukraina 24. februar i fjor publiserte Burdin ein protest på nettsida til landsbykyrkja. Han gjorde det saman med den pensjonerte kollegaen Georgi Edelstein. Dei skreiv at kristne ikkje kunna teia «når ein bror drep ein bror, ein kristen drep ein kristen.»
