Kva er det som skjer?

Starten av 2024 har fått mange tenkjande menneske til å undrast. Veka etter veka har vi opplevd den eine familietragedien etter den andre. Unge og eldre menneske i nære relasjonar, ja, i familiar, tar livet av kvarandre. Mord og vald er ikkje noko nytt. Men aldri har vi opplevd dette på eit slikt nivå. Kva er det som skjer med det norske folket?

Eg er ikkje profet. Har aldri vore det, og trur aldri eg blir det. Sjølv om Paulus i Korinterbrevet seier at «de kan alle tala profetisk», og vi skal streva etter denne nådegåva.

Men ein Jesu-disippel har eg vore. Er det framleis, og vil vera det til eg forlèt dette livet. Heilt utan åndeleg høyrsel trur eg heller ikkje eg er. Jesus sa det ofte: «Den som har øyro, han høyre.» I Openberringsboka får alle dei sju kyrkjelydane denne avsluttande replikken frå Jesus: «Den som har øyro, han høyre kva Anden seier til kyrkjelydane.»