Lande – utan å krasjlande

I juni starta eg som rektor på Misjonsskulen Gå Ut Senteret, Normisjon sin bibel- og misjonsskule i Trondheim. Noko av det fyrste eg fekk vere med på var skuletur. Siste kvelden på turen var det delekveld og studentane fortalte kva bibelskuleåret hadde gjort med dei. Det var sterkt å lytte til det dei fortalde. Dei hadde lært mykje om seg sjølv, om Gud og blitt utfordra til misjon.

I evalueringa etter skuleåret kom det fram at omtrent ein tredjedel av studentane såg for seg at dei sjølv skulle vere eittåring, volontør eller gå inn i langtids misjonsteneste i utlandet. Like mange ynskte å vere engasjert i misjon i Norge. Det var tydeleg at dei hadde landa dette skuleåret på ein veldig god måte.

Omtrent halvparten av fjorårsstudentane heldt etter sommaren fram på Tjeneste og ledelse. Studentane på denne linja kombinerer teneste som eittåring eller ungdomsarbeidar med undervisning og samtalar med ein mentor. I løpet av året skal dei ha åtte veker med undervisning i Trondheim og ti individuelle mentorsamtalar.