Kommentar
PÅKLEDD: Kulturministeren vart kåra til årets «fag-hag» under årets Oslo pride. Ei passande takk for utmerkinga var å blotta seg, først på pride og via VG for heile nasjonen.
Ilja C. Hendel
Når pride er prioritet, er topplaus minister «helt fint»
Ein kulturminister som blotta seg og ein lærar som gjorde det same. Det eine får statsminister-velsigning. Det andre er straffesak.
Den rosa konfettien er truleg feidd opp, og det er tid for tilbakeblikk: Den 25. juni vart kulturminister Lubna Jaffery (AP) utnemnt til det som vert kalla «fag hag». Slang-ordet tyder ei kvinne som held lag med homofile menn, men her er det ei utnemning som gjer henne til dei skeive sin høge beskyttar. Ho seier det er ærerikt. At det forpliktar.
Opptrinnet hennar under arrangementet «Pride preik» i Oslo pride var likevel alt anna enn ærerikt. Men ein kulturminister som blottar seg, minner om kva som er så ubehageleg med den «stolte» mentaliteten. Den krev at vi alle lydig må le av og lika eit såkalla «puppe-stunt». Noko anna vil vera snerpete. Derfor ler folk med. Og statsministeren er på pletten med sjølvsagde bifall.
Jonas har jo sjølv vore gjennom den audmjukande kverna til pride. Kven kan gløyma den flaue seansen då han og Raymond Johansen pesa seg gjennom nokre ukomfortable «moves» på Oslo pride i 2019? Ein robot og hans raudsprengde sekundant på veg vekk frå alt som heiter raffinement. Men pride krev den slags lojalitet.
