Debatt
EIT ALTERNATIV: Det er når NLA Høgskolen får vera den høgskulen han er oppretta for å vera, vi treng NLA, skriv Johannes Kleppa.
Herman Frantzen
NLA er ei einsleg svale i høgskulesektoren
Eit verdidokument ved ein kristen institusjon kan ikkje vera generelt og uforpliktande.
Professorane Gunn Vedøy og Karl Øyvind Jordell var svært raskt på banen (Dagen, nettavisa 9/1) med lange innlegg som svar på min epistel i Dagen 6/1. Eg skal ikkje gå inn på det dei skriv, fordi det delvis ligg utafor mitt hovudsynspunkt, og fordi det berre vil tretta lesarane. Eg vil berre gje ein kort sluttreplikk med tanke på hovudsaka for meg.
NLA vart stifta av ei rekkje kristne organisasjonar med tilknyting til bedehuset. Heilt frå starten hadde NLA vedtekter som viste basis og føremål, og lærarar til institusjonen var rekrutterte ut frå dette. Etter det har NLA utvida og utvikla seg mykje. Sjølv fekk eg gleda av å vera med og dra igang lærarutdanninga på Breistein. NLA Høgskolen har vorte ein rimeleg stor fri kristen høgskule.
Det har gått over femti år sidan NLA vart skipa, og i denne perioden er mykje endra i det norske samfunnet, ikkje minst når det gjeld utdanning og forsking. Det må sjølvsagt NLA ta omsyn til og praktisk sett tilpassa seg.
