Leder
TILBAKE TIL KJERNEOPPGÅVENE: Når det smell, måler vi neppe Forsvarets suksess i graden av korrekt avstemd kjønnsbalanse.
Anette Ask/Forsvaret/NTB
Norsk forsvar: På tide med slagkraft i staden for slagord
«Vi held Noreg trygt i ei kompleks og uroleg verd» heiter det på Forsvarets heimeside. Men vegen frå slagord til slagkraft har blitt altfor lang, og lista av gode føremål likeså. Det er tid for å blankpussa Forsvarets kjerneoppgåve.
Sist helg avslutta årets utgåve av Protestfestivalen i Kristiansand, og laurdagens panelsamtale om norsk beredskap og forsvar var truleg ein av dei meir engasjerande.
Panelet, med forskar Cecilie Hellestveit, tidlegare generalinspektør for Hæren, Robert Mood og den finske idehistorikaren Nils Erik Forsgård i spissen, leverte ein tankevekkande og frittalande analyse.
Slike analysar er uløyseleg knytt til den deprimerande februardagen i 2022, då vi skjøna at Russland hadde drege Europa med seg inn i si groteske tidsmaskin, berre for å spy oss ut i ein ny epoke for mellomstatlege krigar. Ein epoke fleire ekspertar så seint som seinhaustes 2021 meinte var eit unnagjort stadium i europeisk storpolitikk.
