Debatt
Nye kostråd – drikk meir vatn og mindre alkohol
Under Arendalsveka i august i år la Helsedirektoratet fram nye kostråd. Vatn vart der framheva som eit viktig element i kosthaldet. Dessutan vart haldninga mot alkohol forsterka. Helsedirektoratet sitt råd er å drikke minst mogleg alkohol for helsa si skuld. Barn, ungdom og gravide bør avstå heilt frå alkohol.
Vidare rår Helsedirektoratet til at dersom du drikk alkohol, er det lurt å sørgje for at du samtidig også drikk vatn, slik at inntaket av alkohol går saktare og den totale alkoholmengda vert mindre.
Annonse
Det er positivt at mange ungdommar og andre i dag er bevisste på å nytte vatn som drikke, i staden for andre usunne drikkar. For å oppretthalde normale kroppsfunksjonar er vatn nødvendig. Helsedirektoratet tilrår at ein vaksen med moderat aktivitet får i seg vel to liter væske per dag – noko mindre for eldre.
Ivar Aasen sa: «Vatn er den sterkaste drikken. Det driv både kvern og sag.»
Kvifor bør ein drikke vatn? Fordi at vatn sløkkjer tørsten mest effektivt, og kroppen treng vatn for at alle delar av kroppsmaskineriet skal fungere. Vatn er gratis, kalorifritt og lett tilgjengeleg i Noreg. Vatn gjer at du toler varmen betre, og det kan gjere at du får mindre vondt i hovudet.
Under trening er vatn nødvendig, og etter trening er vatn naudsynt for at kroppen skal komme seg raskt og bli klar for nye prestasjonar. Vatn er nødvendig for å tenkje klart.
Alkohol er eit næringsstoff. Det gjev energi og kaloriar, men det har ingen kjente gunstige effektar, og det er giftig for alle kroppen sine organ.
– Ein får ingen mangelsjukdomar ved å unngå dette næringsstoffet, sa stipendiat Erik Arnesen som har vore medlem i Nasjonalt råd for ernæring i fjor. Arnesen seier ny forsking viser at det ikkje er noko «trygg grense» for alkoholinntak. Forsking syner at og små inntak av alkohol aukar risikoen for brystkreft og spiserørkreft.
Elles syner forsking at inntak av alkohol gjev større risiko for over to hundre sjukdomar, mellom anna kreftsjukdomar, hjarte- og karsjukdomar og psykiske lidingar.
Tre psykiske konsekvensar av alkoholinntak er dårlegare søvnkvalitet, auka angstnivå og auka depresjon. Drikk ein vatn slepp ein desse psykiske konsekvensane.
Annonse
