Debatt
Ord med makt og verknad
«Utrydding av menneske fordi dei tilhøyrer ei bestemt gruppe.»
Kva er vel dette for utsegn? Kva folkegruppe kan det her dreia seg om – kven gjeld dette? Utsegna er henta frå Wikipedia: – Det er definisjonen på: Folkemord.
Annonse
Kor langt må ein gå for å møta denne folkegruppa som er utsett for eit slikt brot på den grunnleggjande menneskeretten – retten til liv? Ikkje lenger enn til næraste sjukehus. 12.000 små menneske vert årlegårs motstandslaust avliva i vårt land, og utgjer abortstatistikken vår. Og dette er ikkje krigsoffer eller mord på fjerne fiendefolk, men våre eigne born – vår eiga slekt – vår næraste familie.
I våre mest konservative kristenkrinsar har nemninga fosterdrap vore nytta. Det er rett på sak og svært så dekkjande, men har vore altfor sterkt og avslørande til å vinna allmenn bruk.
Ingen abortforsvarar vil nytta eit så grufullt omgrep, difor er ordet abort det einaste som har vore i bruk – nettopp fordi det er framandgjerande for saka. Men ikkje eingong den modigaste kristen, og slett ikkje ein journalist eller politikar har våga å kalla abortpolitikken vår det som er mest reelt og nærliggjande: Folkemord.
Kan me kalla oss ein kulturnasjon med kristeleg og humanistisk vedkjenning når me trassar og bryt denne grunnleggjande menneskeretten?
