Debatt
DEPORTERT: Nicaraguas opposisjonsleiar Felix Maradiaga poserar for ein selfie i Chantilly, Virginia. Maradiaga var blant rundt 222 fangar som kom frå Nicaragua til Washington Dulles internasjonale lufthavn torsdag sist veke.
Jose Luis Magana / AP / NTB
26 års fengsel for biskop – Ortegas diktatur må ta slutt
Eg skreiv i Dagen (13.2.) om at den ein gong så hylla nicaraguanske frigjeringshelten Daniel Ortega no prøver å knusa kritikken også frå den katolske kyrkja. Fleire prestar, prestestudentar og ein kameramann er dømde til 10 års fengsel for «konspirasjon» og «spreiing av falske nyhende» for sin kritikk av Ortega-diktaturet.
I helga kom meldinga om at Ortega har deportert 222 politiske fangar til USA, etter ei forhandling med Washington. Dei vart sette på eit fly 9. februar. Fleire av dei dømde prestane, dei to prestestudentane og kameramannen er blant dei 222. Ortega kallar dei landsforrædarar og har ikkje bede om noko i byte for å bli kvitt dei 222.
Den modige og tydelege biskop Rolando Álvarez, som har sete i husarrest sidan 19. august i fjor, skal ha nekta å bli deportert. Han er no dømt til meir enn 26 års fengsel og er flytta frå husarrest til ei celle i fengselet La Modelo Tipitapa. Også han er funnen skuldig i «konspirasjon» og «spreiing av falsk informasjon». Biskopen seier at han vil sona straffa for dei som er dømde og deportert.
