Pinse – meir enn ei historisk hending

Vi har nett feira pinse på ulikt vis. Denne høgtida er det mange som ikkje forstår. Pinse er likevel ei av dei store hendingane i frelseshistoria, eit høgdepunkt som både Jesus og profetane talte om. Det er ei historisk hending som er eit verkeleg vendepunkt i menneskesoga.

Etter Jesu triumferande død og oppstode sette han seg ved Guds høgre hand i himmelen. Han fekk all makt i himmel og på jord og vart krona med ære og herlegdom.

Som bevis på at frelsesverket var fullført, vart den tredje personen i guddomen, Den Heilage Ande, rent ut over læresveinane på pinsedag. Sidan den dagen har Anden teke bustad mellom menneska på permanent basis. Denne historiske hendinga er verdt å feira.

Den beste måte å feira dette på, er å drikka djupt av Anden kvar einaste dag. Pinse er mykje meir enn ei historisk hending. Pinse er meint å vera ei personleg oppleving av Andens nærvær og verknader dag for dag. Vi er født på ny ved Den Heilage Ande og kan gleda oss og nyta fruktene av dette heile tida. Vi er døypt med éin Ande til å vera éin kropp, og vi har alle fått éin Ande å drikka.

Jesus sa at alle som tørstar kan koma til han å drikka. Dette sa han om Anden dei skulle få som trudde på han. Frå dei som trur på han skal det, som Skrifta seier, renna elvar av Andens levande vatn. Dette kunne først henda etter at Jesus var herleggjort. Pinse er beviset på at han er herleggjort. No kan vi alle drikka djupt av Anden. Vi skal ikkje drikka oss fulle av vin, det fører berre til utskeiingar, men vi skal heile tida stadig bli fylte av Anden.

Det er ikkje nok å sjå tilbake til ei historisk hending, den nye fødsel eller dåpen i Den Heilage Ande, vi må drikka oss utørste av Anden kvar dag og stund. Då vil vi få kraft til å vera vitne om den levande Frelsaren som set folk fri, som fører folk frå mørke til lys, frå satans makt og til Gud rike. Det er Anden som formidlar Guds kraft til frelse for oss menneske. Han deler også raust ut av sine gåver for å velsigna og hjelpa folk.

Utan Andens kraft sit vi att med ord og teoriar om evangeliet. Vi kan snakka i juridiske termar om rettferdiggjering, samstundes som vi er bundne av synd og strevar med lyst til det vonde i vårt hjarte. Det er ikkje eit liv i Anden, for han set oss fri og omdannar oss frå herlegdom til herlegdom. Anden set oss fri frå det gamle livet og skaper nye frukter i oss.

Andens frukt er kjærleik, glede, fred, tolmod, mildskap, godleik, truskap, audmjukskap og sjølvdisiplin. Lever vi ved Anden, har vi krossfest kjøtet med lidenskapane og dei vonde lystene.

Livet i Anden er eit liv i fridom der talsmannen heile tida herleggjer Jesus for oss og minner oss om kva han har gjort for oss og i sin nåde gjeve. Anden hjelper oss å finna vår identitet i Kristus og å sjå kven vi er i han. Hos kvar einskild openberrar Anden seg slik at det blir til det gode. Han deler ut sine gåver til kvar einskild som han vil. Difor skal vi jaga etter kjærleiken og streva etter åndsgåvene, slik at vi kan byggja kvarandre opp og formidla Guds kraft til frelse og frigjering til folk rundt oss.

Pinse er historia om redde og feige menneske som blir forvandla. Det er historia om fornektarar som blir frimodige forkynnarar. Pinse er historia om forandring. Difor kan pinse ikkje berre vera historie, men kan vera noko vi dagleg lever i. Anden fornyar og forandrar oss dag for dag.