Tendensiøs NRK-reportasje frå Israel og Gaza

Sundag 16. oktober fekk me ein reportasje i Dagsrevyen der nokre som opplevde krigen våren 2021 vart intervjua. I Gaza vart ein mann som hadde mist kone og fire born då huset hans vart bomba av Israel, intervjua. Han hadde ei jente att, og ho ville han gje eit godt liv.

Me såg ei gruppe palestinarar som sto bak eit hushjørne og såg på at eit hus litt unna vart sprengd av ei bombe eller ein rakett. Visste dei att nettopp det huset skulle bombast? Det vart og opplyst at det gjekk seint med å byggja hus opp att fordi Israel hindra innførsel av byggjemateriale.

På israelsk side vart ei mor og ein gut som hadde fått øydelagt huset sitt av ein rakett frå Gaza, intervjua. Då vart ingen drepne. Det var og intervju med ei israelsk kvinne som sa at dei vonar på fred, men dei (palestinarane?) vil ikkje. Ho sa og at ho tykte det var vondt med dei palestinarane som vart drepne.

Dette skulle vel vera greitt?

Men kva var det som ikkje vart sagt? Det var rakettåtak frå Gaza inn over israelske sivilsamfunn som utløyste krigen. Før og under krigen kom det omkring 4.000 rakettar. Dei siste 17 åra har det komme minst 24.000 rakettar frå Hamas inn over israelske sivilsamfunn. Dette må Israel forsvara seg mot av omsyn til sitt eige folk.

Israel okkuperer ikkje Gaza, og kan ikkje berre gå inn og arrestera dei som skyt med rakettar. Dei må ta ut dei stadene som rakettane kjem frå og eventuelle våpen- og ammunisjonslager. Dette er lovlege militære mål endå om husa tilhøyrer sivile palestinarar.

Hamas og andre som sender rakettar frå Gaza har for vane å bruka sivile hus som base for krigshandlingane sine. Det er imot alle krigens reglar. Det tyder at dei brukar sivilsamfunn som skjold for krigshandlingar. Og det er vel kjent for alle som vil vita det, at dei gjer det.

Men krigarane på Gaza kalkulerer med at ein sivilisert stat som Israel mest mogleg vil unngå å skada sivilsamfunnet, og skulle nokre palestinarar verta drepne, som er uunngåeleg med den krigføringa som Hamas står for, vil folket på Gaza få sympatien. Det er kynisk av leiarane i Gaza.

Den vanlege regla om ulovleg okkupasjon gjentas

Israel har restriksjonar på levering av sement og anna byggjemateriell til Gaza fordi mykje av det dei får inn, vert brukt til smuglartunnelar under grensa til Israel. Desse har ingen ting med smugling av mat og andre forbruksvarer å gjera, men smugling av soldatar som kan utføra terror og eventuelt kidnappa jødar som kan gje stor gevinst i ein handel om å få fri terroristar frå israelske fengsel. Slikt har hendt før.

Alt dette veit folka i NRK, men likevel vel dei å laga ein (såkalla) balansert reportasje der sympatien heilt tydeleg ligg hjå palestinarane som opplever å få husa sine sprengde av israelske rakettar. Men kva val har israelske styremakter som vil forsvara innbyggjarane sine?

Løysinga ligg ikkje hjå Israel, men hjå arabarstatane som starta det dei trudde skulle verta utslettingskrigen mot Israel 15. mai 1948.

Eller kanskje me skal seia at løysinga er noko som menneske ikkje rår over. I alle høve skal me behandla Israel rettferdig i den pågåande konflikten.

Fagforeningsleder vil omgjøre Israel-boikott, men motstanden er stor